نصائح هامة وإجراءات يجب اتباعها عند شراء الوحدات فى النخيل بالإسكندرية

أسامة صبحى

كثيرا ما يتساءل البعض حول شراء الوحدات السكنية فى قرية أكتوبر، النخيل بالإسكندرية، وكيف يمكن له أن يتأكد من صحة عملية الشراء، ولمساعدة هؤلاء نقدم نصائح هامة عن الشراء يجب الأخذ بها، واتباع بعض الإجراءات، التى من شأنها أن تحفظ له حقوقه.

وعن تلك النصائح والإجراءات التى نقدمها لراغب الشراء فى النخيل، نلخصها فى الآتى، وبعبارات بسيطة ومفهمومة.

أولا: رخصه العمارة والرسم الهندسي لها، وهنا لابد من أن تطلع  عليها بنفسك متسمعش كلام السماسرة ولا البواب لأن كل واحد بيعمل لمصلحته وضروري تأخد صورة منها وياريت تتعب شويه وتتأكد منها من حى العجمى لأن هناك عماير خمسة أدوار ومخالفه علشان خاطر مفيش فيها رخص وأخرى أول دور فيها المفروض يكون جراج ومعمول شاليه ودي بيكون مطلوب عليها مصالحة.

ثانيا: ياريت قبل اتمام عملية الشراء تتأكد من تسلسل الملكية من الجمعية في مدينة نصر وليس النخيل  لأن بيكون في أوراق مضروبة  كتير وفي أمثلة على ذلك.

ثالثا: مفيش شقق في النخيل مسجلة شهر عقاري، وإنما توجد توكيلات البيع لنفسك وللغير ولابد أن تتأكد من تسلسلها بالضبط الشقق المسجلة شهر عقاري أو من حقها التسجيل في الشهر العقاري هي اللي قطع الاراضي المبنية عليها خارج تقسيم الجمعية ويكون عقدها نهائي مع صاحب العقار  من الإصلاح الزراعي ودي قليله جدا .

رابعا: التأكد أن الشقه فيها عداد نور خاص بها منفصل محدش يشتري في عماره فيها عداد نور مشترك للعماره كلها ضروري قبل اتمام عملية الشراء تصور عداد الكهرباء وتوصل لحد الشركه في شارع ٦٥ وتتأكد بنفسك ان مفيش اي مديونية علي الشقه  وكذلك عداد المياه ضروري جدا في شارع ٦٥ أمام  شركه الكهرباء لأن فيه عماير بيكون عداد المياه فيها خلسه وبتكون المديونيه عليها كبيرة تصل إلى٢٨٠ ألف جنيه في بعض الأحيان.

خامسا: اي حد هيشتري في العماير الجديده اكتر من خمسه ادوار لابد انه ياخد نموذج ٣ الخاصه بجديه التصالح ووقف المخالفه علي الشقه ويكون برقم الشقه واسم البائع نفسه.

سادسا: أى حد حيشتري شقه وتكون مسجلة في الجمعية يشوف المديونيات السابقة ويخلي البائع هو اللي يدفعها  وكذلك ايصال دفع مصروفات الصرف الصحي والضرائب العقاريه لان انت بتتكلم في مبالغ كبيرة اخرى يجب على البائع انه يكون مسددها.

سابعا: اوراق تخص العماره لابد من أخذ صوره منها وتحتفظ بها لنفسك وخاصه الرخصه والرسم الهندسي ومحدش يسمع أي كلام غير بمستند رسمي ويراه بعنيه ويمسكه في يده.

ثامنا: محدش يسمع لكلام أي بواب أو سمسار أو الشله اللي بتكون موجوده بتحلل البيعه من أجل استفادة شخصية.

تاسعا: الناس اللي بتشتري شقه بالروف خدو بالكم كويس علشان الروف في مصاريف الصرف الصحي بيتحسب شقه منفصلة وخد بالك كويس ممكن يكون السمسار مظبط مع حد من الجمعية لان ده شغلهم مع بعض بصفه مستمرة.

في النهايه لابد من التأكيد من كل ورقه موجوده ويكون معاك صوره منها وخاصه المذكورة عاليه وضرورى وبالذات الناس اللي بتشتري بالتقسيط وبتكون مستعجله على عمليه الشراء لو الحاجات دي مش موجوده متشتريش علشان هتتعب وتغرم كتير جدا فيما بعد.

وحاجه أخيرة أي شرط جزائي هيتعمل لابد من الذكر في ان اي مخالفه هتيجي علي الشقه من قبل الشراء ان الطرف البائع هو اللي يتحملها وده ضروري جدا جدا خاصة ان النخيل فيها مخالفات مباني كتير.